O Marco Conceptual da Orientación Laboral: reflexión persoal

O Curso de Posgrao de Especialización en Orientación Laboral tivo como punto de partida un achegamento ao marco conceptual referente á orientación laboral, centrándose en varios temas fundamentais:

-O Marco de Referencia da Orientación Laboral. As Políticas de emprego nacionais e europeas vixentes e previstas para os vindeiros anos onde se enmarcan as estratexias e os plans de emprego pensados para o aumento das oportunidades laborais principalmente daquelas persoas con maior dificultades de inserción. As políticas de emprego europeas marcan as directrices a seguir e nas que se deben basear cada país para o deseño das súas propias. Achegamento aos sistemas de emprego existentes en España: o Servizo Público de Emprego e no caso da nosa comunidade autónoma, o Servizo Galego de Colocación, que son os encargados da xestión das políticas activas e pasivas de emprego.

Para o ámbito da orientación laboral é fundamental coñecer de primeira man as estratexias e políticas de emprego que van rexir o mercado laboral nos próximos anos tendo en conta que estas marcarán as directrices a seguir ao persoal orientador.

-O Mercado Laboral, que é e cales son os seus indicadores, os tipos de desemprego existentes, así coma a situación actual: normativa, ocupacións e novos xacementos de emprego e os perfís profesionais. Un apartado importante adicouse ás ocupacións e fíxose fincapé nos instrumentos e ferramentas para o estudo do mercado de traballo, como son os observatorios (autonómico, estatal e europeo). Tamén se explicaron as posibilidades de emprego ás que nos podemos acoller, tanto por conta allea como por conta propia así coma a normativa e apoios en cada unha das modalidades.

É fundamental, como persoal do ámbito da orientación laboral, coñecer en profundidade a situación do mercado laboral e as posibilidades e novas vías de emprego, para poder ofrecer á persoa un asesoramento axeitado tendo en a súa situación particular e do seu territorio.

-No referente á Certificación e Formación Profesional traballouse sobre o sistema de cualificacións profesionais con respecto ao Marco Europeo das cualificacións, ao Sistema Nacional de Cualificacións e ao Instituto Galego das Cualificacións e fíxose un achegamento ás Competencias Profesionais e ao procedimento e requerimentos de acreditación das mesmas así coma aos Certificados de Profesionalidade e Formación para o Emprego.

Este é un aspecto fundamental no desempeño da nosa profesión, tendo en conta as necesidades de reciclaxe profesional das persoas en situación de desemprego así coma a posibilidade de que moitas persoas con coñementos adquiridos a través da experiencia teñan a oportunidade dun recoñecemento de ditas competencias por medio dunha acreditación.

-Achegamento á Política Social e de Emprego na Unión Europea, as estratexias máis recentes e as institucións e organismos comunitarios en materia de emprego así coma os organismos actuantes. Información sobre os fondos para o financiamento das políticas de emprego, como é o Fondo Social Europeo e o Fondo Europeo de Adaptación á Globalización. Políticas Activas e Pasivas de emprego na UE e en España e explicación sobre o Programa Progress.

Unha parte importante referiuse á mobilidade dos traballadores respecto a requisitos, dereitos e normativa aplicable neste caso así coma as redes de información que existen a nivel europea para informar e orientar ás persoas interesadas en traballar nalgúns dos estados membros da Unión Europea.

Na situación laboral que atravesamos, cada vez máis persoas deciden buscar unha oportunidade laboral fóra do noso territorio, polo que é necesario ter un coñecemento das institucións, organismos, ferramentas e recursos existentes para derivar á persoa aos mesmos e que poida recibir un asesoramento axeitado antes de dar o paso. Hai que ter en conta que os requisitos que marca cada país referente ás necesidades e oportunidades que van ter as persoas procedentes doutro estado son diferentes e é fundamental ter coñecemento de antemán das oportunidades reais que podemos ter para minimizar o risco de fracaso.

-A Iniciativa Emprendedora como forma de acceso ao mercado laboral. O emprendemento e os beneficios sociais da creación de empresas e os elementos esenciais no proceso de creación de empresas, como son a idea, as características da persoa emprendedora e o plan de empresa. Tamén fixemos unha aproximación aos contidos esenciais a ter en conta á hora de deseñar un plan de empresa.

Unha oportunidade para as persoas en situación de desemprego de retorno ao mercado de traballo consitúea a posta en marcha dunha actividade emprendedora. Coñecer as características do traballo por conta propia e da creación de empresa así como da normativa e regulación ás que deben someterse as persoas que opten por esta vía, os organismos e recursos de apoio e asesoramento que existen ao respecto así como as vías de financiamento para o emprendemento son esenciais para dar resposta á demanda que as persoas nos transmiten. Así mesmo o coñecemento do que é un plan de empresa e as pautas básicas para o deseño do mesmo, apoian a nosa labor no asesoramento e orientación á persoa que mostra interese nesta oportunidade de inserción laboral.

Os aspectos traballados neste primeiro módulo son fundamentais para ofrecer unha atención de calidade ás persoas que temos no noso servizo sendo quen de darlle resposta ás súas necesidades e demandas concretas. O desenvolvemento da nosa profesión conleva unha aprendizaxe continua e unha adaptación ás novas necesidades que o mercado laboral demanda así coma as persoas que utilizan os servizos de orientación. Coñecer en profundidade estas demandas repercutirá nunha mellora sustancial da calidade do noso desempeño profesional.